pamikandayu

asnang karalumdum kilwal
ing bulan ali ya makaslag
at dadabeong king balugbug
ing alang lagyung kataimikan
milalampungan la retang adwang pusa nandin
ngiyaw na lang ngiyaw e ko pansin
siguru miki busbus ne’ng babo yeru
king bengi-bengi rang piglalandian
reta mang lasing king katulid bale
ala nang danyos ing pamagkainge ra
tanda ku pa dati
alang mintis ku lang pamasibasan
neng miraras galingaldo
ing pilmi’t alang tugot a tigtigan
anti na kanini ing sabla ngeni
menibat inyang migkandayu
ing sadyang makule’t maingeng yatu
mipmu neng dalumdum
atneng kataimik
paniglon ku ing bayung peklat ku gamat
mimpis at labug king aslag
ning sulung malalam
ning kuwartung pipapaynawan
balamo rugu ing sugat ning pamikandayu
atiyu keni – atiyu keni
lumino’t pumula oneng atiyu
ing kaplas ali kakampa