KAYBAT NING ALBUG

magparagan yang tapang
ing misakab a balayan:

titikad-tikad nang sisinup
ning mangaskad a gaindung pusa
reng pakamalan nang kuting.

bandera neng makatas
ing iki ning makaung a asu
magtumaila at e ne magbitaul.

batalyon lang misasaup
magsalansan pamangan
reng maranup a panas.

titigtig lang dalit-suyu
retang mengapirat
a bulung saging.

mumuma ya king gabun
ing kakawakawate
lulsut-lulbug a bulati.

ume neng maglantang
ing megkalag sapot
a mitutundung babagwa.

at umeng mibabalik
ing maglimayung musa
ning barubal a poeta.

awa! milalantang pasibayu
ing aske ning pag-asa
kaybat ning albug.