MAMERA
Setyembre 8, 2012
Mamera mu ing panaguimpan quing iatu
Micalat at micacalat;
Ninu mo ing malintuang a magsabi
Alang managuimpan a capara nang tau?
Managuimpan ia ing bulag
Mapaliaring bisa iang sumala mata
Ing maclac, managuimpan ia
Bisa iang macaramdam siuala
Macanian mu naman reng pipi
At male tamu, pati reng cocoronting, managuimpan la
Managuimpan la!
Caia e mu cu cucutnan
Baquit ating magwelgang ubreru?
Ba’t magrali la reng ortelanu?
O’t megpiket la ding maestru ampong istudyanti?
Mamera mu rin casi ing ulaga ring dalita
Mamera mu, mamera mu!
Micalat at micacalat — balintuna rang palad.
Maralas, e ra la pipansinpansin
Maralas da lang titisuran
Caia quelangan lang mamuersa
Quelangan lang lumual at cumalat quing dalan
Calupa ding sablang bage a e uukulang ulaga
Quelangan lang lumwal at kumalat quing dalan
Ba rang apaquit
Ba rang apaquilala
Ing mamaslag rang entidad.
Caia, e mu na cucutang pa
O’t ating magpiket at magwelga?
Metung mu ing paquibat cu queca:
“Managuimpan la ring dalita…”
At dapat tang igalang
Banal rang carapatan.